تَعُج كافيهات غزّة بالشباب والكورة وأم كلثوم وللصبر حدود الباسورد لو سمحت وواحد يانسون وكان عندي غزال كَفُّه محنِّي ودارت الأيام ومرِّت الأيام علی حطّة إيدَك الشدة في إيد مين فِت يا حاج طرنيب الشيشه نزلت وغيوم دخان في المكان وتريكس والقرف يُولَد من رحم المعاناة .. يفضَح عرضُه هالرّحم ما حدا راضي يعمللو إزالة واللي شبكنا يخلصنا ..!!
كما وتَعُج الشوارع في غزة بالصور وتَعُج من "العُجَّه" والعُجَّه بصل وبقدونس وبيض زي الوضع وإلى آخره أي أنها مليانه صور إشي شكراً وإشي عفواً لكل واحد دفعلنا شيكل .. الله يستر بعد ما تدعمنا الهند ما تصير البلد "لافاشكيري" !!
على الهامش : برقيّة عاجلة للفصائل الفلسطينية بمناسبة (يوم الجريح الفلسطيني) !!
بكفّي ترشُّوا ملح عَ الجرح .. الناس مجروحه بغزّة ومن غزّة ومجروحه بالضفّة ومن الضفّة وحُطّولي الاحتلال عَ شَقّه . التفاصيل طرفكم خسارة عَ "حبر الكيبورد" يروح عَ الفاضي .. اتَّقُوا الله في شعبكم وفي قضيتكم المجروحه أو خدوا الكراسي وأعطونا "بلاستـر" !!
